काठमाडौं, ७ असार । नेकपा (माओवादी केन्द्र) का अध्यक्ष तथा प्रधानमन्त्री पुष्पकमल दाहाल यतिवेला शक्ति सञ्चयको लागि सक्रिय बनेका छन् । आँफै सरकारको नेतृत्वमा रहेका दाहालले सत्ता गठबन्धनमा रहेका दुई दल र सत्ता बाहिर रहेको अर्को एक दलसँग मिलेर चार दलीय समाजवादी मोर्चा नेपाल गठन गरेका छन् । कतिपयले दाहालको उक्त कदमलाई प्रतिरक्षाको कदम भनेका छन् ।
कतिपयले भने अरु दलले आन्तरिक संकट भोगेको कारण प्रचण्डले त्राण भरिदिएको भनेर पनि चर्चा गर्ने गरेका छन् । माओवादी केन्द्र, जनता समाजवादी पार्टी नेपाल, एकीकृत समाजवादी र नेकपा मिलेर समाजवादी मोर्चा नेपाल गठन भएको छ । मोर्चाको नेतृत्व आलोपालो गर्ने सहमति छ । अहिले मोर्चाको संयोजक प्रचण्ड आँफै छन् । समाजवादी मोर्चाको वकालत गर्ने नेपाल समाजवादी पार्टीका अध्यक्ष तथा पूर्व प्रधानमन्त्री डा. बाबुराम भट्टराई भने मोर्चामा समेटिएनन् ।
उनी नसमेटिनुमा उपेन्द्र यादवलाई देखाईएको छ । जुन कुरा स्वयम प्रधानमन्त्री प्रचण्डले पनि सार्वजनिक रुपमै स्विकारेका छन् । प्रधानमन्त्री दाहालको ध्यान भने बाबुरामभन्दा पनि विल्लवतर्फ छ । उनी विप्लव नेतृत्वको नेकपासँग एकताको गृहकार्यमा जुटेका छन् । दाहालको सचिवालयले पनि आज विप्लवसँग पार्टी एकताबारे प्रधानमन्त्री दाहालले छलफल गरेको पुष्टि गरेको छ।
पछिल्लो समय विप्लवले प्रधानमन्त्री दाहाललाई साथ दिँदै आएका छन् । माओवादी केन्द्रसँग एकता भए विप्लवलाई महासचिव बनाईने चर्चा छ । माओवादीमा यतिवेला देव गुरुङ महासचिव छन् । महासचिवमा दुई शक्तिशाली नेताहरु जनार्दन शर्मा र वर्षमान पुनले तिव्र चाहना राखेपछि दाहालले शर्मा र पुनमध्ये एक रोज्दा अप्ठ्यारो हुने भएकोले गुरुङलाई महासचिव बनाएका हुन्।
अहिले विप्लव माओवादीसँग एकताको लागि तयार भए महासचिव बनाउने दाहालको तयारी छ । पछिल्लो समय माओवादीहरुलाई एकताबद्ध बनाउने अभियानमा दाहाल जुटिसकेका छन् । यसको लागि दाहालको विश्वासपात्रको रुपमा कृष्णबहादुर महराले निर्णायक भूमिका खेलेका छन् । विप्लवसँग महरा नै निरन्तर सम्वादमा छन् । विप्लवमा जनताको पनि समर्थन रहेकोले प्रचण्डले उनको साथ खोजेको चर्चा हुने गरेको छ ।
प्रधानमन्त्री दाहालले बाबुरामसँग पनि एकताको लागि गृहकार्य भैरहेको र अन्तिम रुप दिन बाँकी रहेको बताउने गरेका छन् । प्रचण्ड आगामी ०८४ को निर्वाचनमा ०६४ को निर्वाचनमा माओवादीले हासिल गरेको सफलता दोहोर्याउने चाहनामा छन् । त्यसको लागि फुटेर चारतिर छरिएका माओवादीहरुलाई गोलबद्ध गर्ने उनको उद्देश्य छ ।
माओवादीनिकट उच्च स्रोतकाअनुसार प्रचण्ड र विप्लवबीच छिट्टै पार्टी एकताको घोषणा गर्ने सहमति बनेको छ । त्यसको लागि दुवै तर्फबाट अहिले गृहकार्य भैरहेको छ । प्रचण्डले विप्लवलाई नै आफूपछिको नेतृत्वको रुपमा विकास गर्न चाहेका छन् । त्यसको लागि उनले पार्टी एकतासँगै विप्लवलाई शक्तिशाली महासचिव बनाउने वचन दिएका छन् । रिपोर्टस नेपालमा भर्खरैखर प्रकाशित समाचार
