राजदूत सिफारिसमा बेखबर परराष्ट्र मन्त्रालय

काठमाडौँ – सरकारले बिहीबार परराष्ट्र सेवाबाट ८ र राजनीतिक सिफारिसका आधारमा १२ जना राजदूत सिफारिस गर्‍यो । ६ महिनाभन्दा बढी समयदेखि रिक्त रहेका २० देशमा सरकारले एकैपटक भागवण्डाका आधारमा राजदूत सिफारिस गरेको हो। दलीय भागवण्डाका आधारमा सिफारिस भएका १२ जनाबारे भने परराष्ट्र मन्त्रालय बेखबर रहेको पाइएको छ।

त्यसरी सिफारिस भएकाहरु कूटनीतिक ज्ञान र अनुभव भन्दा पनि प्रभावशाली नेताहरुको निकट रहेकाहरु छन्। परराष्ट्र सेवाका व्यक्तिहरुको नाम मन्त्रालयले औपचारिक प्रस्ताव लगेर सिफारिस गरिएको भए पनि राजनीतितर्फका १२ जनाको नाम भने पहुँचका आधारमा गोजीबाट नाम झिकेर सिफारिस गरिएको मन्त्रालय स्रोतले जानकारी दियो।

परराष्ट्र मन्त्रालयका एक उच्च अधिकारीले देश सञ्चारसँग भने, ‘राजनीतिक आधारमा सिफारिस हुनुभएका व्यक्तिहरुको बारेमा हामीलाई जानकारी छैन। उहाँहरुको नाम मन्त्रालयमार्फत मन्त्रिपरिषद्‌मा पेश भएको होइन।’

राजनीतिक हस्तक्षेपका कारण योग्य र सक्षम व्यक्तिको हातबाट टाढा हुँदै गएको भनेर आलोचित हुँदै आएको कूटनीति सेवामा बिहीबारको घटनाले थप चिन्ता थपेको छ। सत्ता गठबन्धनमा रहेका दलहरुबीच भागवण्डाका आधारमा सिफारिस भएका व्यक्तिहरु ठूला नेताका नातागोता, विश्वासपात्र र आर्थिक हिसाबले बलियो पृष्ठभूमि भएकाहरुले अवसर पाएका छन्।

माओवादी केन्द्रको कोटामा चीनका राजदूतमा सिफारिस विष्णुपुकार श्रेष्ठ कूटनीतिक अनुभव र ज्ञान नभएका व्यक्ति हुन्।

माओवादी केन्द्रको निर्वाचन विभाग प्रमुख रहेका श्रेष्ठले शिक्षण पृष्ठभूमिबाट राजनीतिमा प्रवेश गरेका थिए। अध्यक्ष प्रचण्डको विश्वासपात्र भएका कारण उनी चीनको राजदूतमा सिफारिस हुन सफल भएका हुन्।

प्रधानमन्त्री शेरबहादुर देउवाले अनुभव नभएको भन्दै उनको नाममा पुनर्विचार गर्न प्रचण्डलाई आग्रह गरे पनि नमानेको स्रोतको दाबी छ। एकीकृत समाजवादीका अध्यक्ष माधवकुमार नेपाल र ऊर्जामन्त्री पम्फा भुसालकी बहिनज्वाइँ पनि राजदूतका लागि सिफारिस भएका छन्।

अस्ट्रेलियाका लागि कैलाश पोखरेल अध्यक्ष नेपालका बहिनीज्वाइँ हुन् भने श्रीलंकाका लागि राजदूतमा सिफारिस भएका वासुदेव मिश्र भुसालकी बहिनीज्वाइँ हुन्। सहसचिवबाट रिटायर्ड भएका पोखरेललाई न्युयोर्कस्थित महावाणिज्य दूतावासमा काम गरेका थिए।

पाँच वर्ष ओमानका लागि राजदूत भएकी शर्मिला पराजुली ढकाल बिहीबार स्पेनका लागि सिफारिस भएकी छन्। प्रचण्डको प्रधानमन्त्री कालमा राजदूत भएकी ढकाललाई नेकपा कालीन अवस्थामा निरन्तरता दिइएको थियो।

वैदेशिक रोजगार व्यवसायी संघका पूर्वअध्यक्ष दानबहादुर तामाङ एमालेबाट माओवादी हुँदै दक्षिण अफ्रिकाका लागि राजदूत सिफारिस भएका छन्।

रुसका लागि राजदूतमा सिफारिस परेका मिलन तुलाधर एकीकृत समाजवादीका नेता झलनाथ खनालका निकट हुन्। मलेसियाका लागि राजदूतमा सिफारिस भएका डिल्लीराज पौडेल कांग्रेस नेता रामचन्द्र पौडेलका निकटस्थ हुन्।

त्यस्तै राजनीतिक कोटामा परेका अरु व्यक्तिहरु प्रभावशाली नेताकै सिफारिसमा परेका हुन्।

कुन देशमा को सिफारिस?
परराष्ट्र सेवातर्फ

१. घनश्याम भण्डारी– बंगलादेश

२. तीर्थराज वाग्ले– म्यानमार

३. डोरनाथ अर्याल– ओमन

४. निर्मलराज काफ्ले– ब्राजिल

५. दुर्गाबहादुर सुवेदी– जापान

६. सुशीलकुमार लम्साल– इजिप्ट

७. हरिश्चन्द्र घिमिरे– बहराइन

८. भरतकुमार रेग्मी– भियना, राष्ट्रसंघीय स्थायी नियोग

राजनीतितर्फ

१. विष्णुपुकार श्रेष्ठ– चीन