काठमाडौँ: नेपाल कम्युनिस्ट पार्टीका महासचिव विप्लवले आजको विश्वको शक्ति सन्तुलन तथा विकसित अन्तरविरोध, मुलुकको वर्गिय एवम् राजनैतिक शक्ति सन्तुलनको विशिष्ट स्थिति र नेपाली क्रान्तिको विजयका लागि पार्टीले अहिलेको कार्यनीति लिएको बताएका छन् ।
नेपाल कम्युनिस्ट पार्टी निकट जनवर्गीय संगठन र मोर्चाद्वारा मंगलबार काठमाडौँमा आयोजित प्रशिक्षण कार्यक्रममा महासचिव विप्लवले यस्तो बताएका हुन् ।
उनले भने, `हामीले नेपालमा समाजवादी क्रान्तिलाई अगाडि बढाउन एकीकृत क्रान्तिको कार्यदिशा अगाडि सारेका छौँ, यो कार्यदिशा अनुसार रणनीति र कार्यनीति विकास गर्न जरुरी हुन्छ, हामीले जनयुद्ध र जनबिद्रोह जस्ता दुवै कार्यदिशाका सार्वभौम मान्यताहरुलाई आत्मसात गर्दै नेपाली मौलिकता र आजको प्रधान अन्तरविरोधलाई हल गर्न नयाँ कार्यदिशाको विकास गर्नै पर्थ्यो, त्यो गर्यौ । शुरुमा हामीले पार्टीलाई पुनर्गठन गर्दा मानिसहरुले हामीलाई मन्त्री नपाएर विद्रोहको कुरा गरेका हुन् भने त्यसपछि हामी अगाडि बढ्दै गएपछि यिनीहरु दरबार वा भारत वा कुनै अदृश्य शक्तिबाट परिचालित छन् पनि भने त्यो पनि समयक्रममा खण्डित हुँदै गयो र अहिले हामीले चुनावी कार्यनीति लिएपछि यिनीहरु संसदवादी भए भन्ने हल्ला गरिरहेका छन्, यो एउटा क्रान्तिकै मोर्चा हो, समयका हिसाबले यो मोर्चा एक डेढ महिनाको मोर्चा हो, यसलाई हामीले सफल पार्नुपर्छ, साम्राज्यवादीहरु हाम्रा विरुद्ध सबै मोर्चा र तरिकासहित आइरहेका छन्, हामीले कुनै एउटा मात्रै मोर्चाबाट मात्रै विजय हासिल गर्नै सक्दैनौँ ।´
एक फरक प्रसङ्गमा महासचिव विप्लवले भने, `सरकारसङ्ग भएको तीन बुँदे सहमतिको कार्यान्वयन नगर्दै हाम्रा नेता कार्यकर्ताहरुलाइ जेल र हिरासतमै राखेर हामीले उठाउदै आएका मुलुकका विद्यमान समस्या र मुद्दाहरुलाई हल गर्नेबारे हामीसङ्ग न्युनतम समझदारी नै नगरी स्थानीय तहको चुनावको बारेमा सरकारले सोच्नु शान्ति प्रक्रिया प्रतिको बेइमानी हो, यसले मुलुकमा फेरि समस्या निम्त्याउछ । यसप्रति गम्भीर हुनुहोस् भनेर सरकारलाई समेत हामीले भनेका छौँ ।´
पार्टीको केन्द्रिय समितिको १२ औँ बैठकले अघि सारेका आगामी योजनाबारे प्रशिक्षण मन्तव्य राखिसकेपछि लिखित प्रश्न उत्तर गर्दै अन्तरक्रियासहित सम्पन्न भएको कार्यक्रमको अध्यक्षता केन्द्रिय सदस्य अनिल शर्मा बिरहीले गरेका थिए । कार्यक्रमको सन्चालन केन्द्रिय सदस्य चिरन पुन मिलनले गरेका थिए । प्रशिक्षण कार्यक्रममा केन्द्रिय सदस्यहरु बन्धु चन्द, आधार, खुमा सुवेदी र सुशीलको समेत सहभागिता रहेको थियो ।
